Në pikat kufitare 1 dhe 31 në veri të vendit, vazhdohet puna jo e kompletuar edhe pse ka gati një vit prej kur Policia Kufitare e Kosovës dhe Policia e EUEX-it ka marrë timonin e drejtimit për këto pika, vazhdon mungesa e vulave të Republikës së Kosovës, bën të ditur RTV21.

Para se të udhëtojë për në New York, kryeministri i Kosovës Hashim Thaçi do ta vizitojë Katarin, vend ky i Ligës Arabe dhe Organizatës së Konferencës Islamike, që ende nuk e ka njohur pavarësinë e Kosovës.

Republika e Hondurasit ka njohur sot zyrtarisht Kosovën shtet të pavarur dhe sovran. Vendimi për njohjen e Kosovës i është kumtuar sot ministrit të Punëve të Jashtme të Kosovës, Skënder Hyseni, nga ministri i Jashtëm i Hondurasit, Mario Canahuati.

Sot, të gjitha stacionet e Policisë së Kosovës do të jenë të hapura për vizita të qytetarëve. Vizitat realizohen në kuadër të projektit “Porta e hapur”, me rastin e shënimit të 11 vjetorit të themelimit të Policisë së Kosovës. Të gjithë qytetarët dhe të gjithë përfaqësuesit e institucioneve dhe organizatave (individualisht apo në mënyrë të organizuar) mund të bëjnë vizita në stacionet dhe njësitë e Policisë së Kosovës, në mënyrë që për së afërmi të njihen me punën dhe ambientet e policisë.

Ministri i Punëve të Brendshme të Kosovës, Bajram Rexhepi, e ka përjashtuar mundësinë e falsifikimit të pasaportave ose dokumenteve të tjera personale të qytetarëve të Kosovës.

Zyrtarë të Policisë së Kosovës për rajonin e Mitrovicës thanë të premten, se njësitë speciale të Policisë së Kosovës “Rosu” janë të autorizuara të patrullojnë në tërë territorin e Kosovës, derisa komentimet se këto njësite kryejnë aktivitete të veçanta në veriun e vendit janë të gabuara, raporton KosovaLive. Zëdhënësi i PK-së, Besim Hoti, tha se njësitë speciale të Policisë së Kosovës janë duke vepruar në veri, posaçërisht përgjatë lumit Ibër, aty ku bashkohet veriu dhe jugu i qytetit, me qëllim të pengimit të kontrabandës dhe aktiviteteve tjera ilegale.

Autoritetet më të larta shtetërore të Kosovës – presidenti Fatmir Sejdiu, kryeministri Hashim Thaçi, dhe ministri i Jashtëm Skender Hyseni, nga e diela do të jenë në New York. Në kryeqytetin e botës ata shkojnë për të lobuar për njohjen e pavarësisë së Kosovës dhe kundër projektrezolutës serbe. Në Presidencë dhe në Qeveri kanë bërë të ditur se lidershipi kosovar do të niset të shtunën, për të bërë natën në Vjenë, e pastaj për të mbërritur një ditë më vonë në New York. Ndërkaq, një ekip zyrtarësh të protokollit tashmë ndodhet atje, për të aranzhuar takimet.

Ajo që shihet si ushtria e ardhshme, Forca e Sigurisë e Kosovës, po planifikon që këto ditë të mbajë një ushtrim për të demonstruar përgatitjet e saj. Mirëpo ka hasur në një problem – nuk ka fishekë. Për ta zgjidhur këtë i është drejtuar Policisë së Kosovës, nga e cila ka kërkuar hua 20 mijë fishekë të kalibrit 9 milimetra. Për të rregulluar këtë çështje, burime të gazetës brenda Policisë kanë bërë të ditur se udhëheqësit e Forcës së Sigurisë të Kosovës janë takuar të hënën në një takim të shkurtër me menaxhmentin e Policisë, nga të cilët ka kërkuar që t’u huazohen fishekët.

Ka nisur dje punën fabrika “Kosovatex” për prodhimin e xhinseve dhe konfeksioneve. Fabrika aktualisht ka treqind punëtorë. Me prodhim kryesisht të orientuar për eksport, “Kosovatexi” synon të bëhet qendër e industrisë tekstile në Ballkan.

Kryeimami i Sanxhakut, Muamer Zukorlliq, i ulur në një kolltuk prej druri të shkruar ashtu siç është tërë ambienti në Bashkësisë Islame në qendrën e Sanxhakut, në Novi-Pazar, thotë se Beogradi është duke mohuar të drejtat e boshnjakëve që jetojnë në këtë zonë. Jeton në hierarki me njerëzit e tij dhe Beogradin e quan “regjim”. Është i vendosur ta formojë Sanxhakun sërish si zonë të veçantë dhe të kërkojë autonominë për myslimanët. Nëse nuk jepet me dialog, thotë se do të shpallet njëanshëm.